Бережнова Ульяна Николаевна

Герой ийэ Бережнова Ульяна Николаевна 

Ульяна Николаевна 1938 сыллаахха кулун тутар 26 күнүгэр Орто Халыма оройуонун Эбээх бѳһүѳлэгэр тѳрѳѳбүтэ. Бииргэ тѳрѳѳбүт тѳрдүѳ этилэр, кини бастакы оҕонон тѳрѳѳбүтэ. Ожогин начальнай оскуолатыгар үѳрэммитэ.

Ульяна кыра эрдэҕиттэн үлэни таптыыр, кыайыгас-хотугас кыыс этэ. Кыра сылдьан лаптаны сѳбүлээн оонньуур этилэр. Волейболга эмиэ оонньуура, кэлин сааһыран баран да оонньуур этэ.

Оскуола кэнниттэн колхозка субан сүѳһү көрүүтүгэр Уһун - Айааҥҥа, Арыы Тумулга үлэлээбитэ.

Ульяна Николаевна сүрдээх холку, сымнаҕас майгылаах, наһаа дьээбэлээх буолара. “Сарсыарда аайы алаадьы астааччы, биһиги ол сытыттан уһуктарбыт. Түннүк тааһын наһаа үчүгэйдик быһара, ким саҥа дьиэ туттубут бары киниэхэ түннүктэрин таастарын быстараллара» диэн оҕолоро ахталлар. 

Аҕалара куруук тыаҕа үлэлиир буолан, эр киһи үлэтин барытын бэйэтэ оҥороро, бэл дружба эрбиинэн мас эрбэтэрэ. Оҕолорун батыһыннаран сир аһын астыырын наһаа сѳбүлүүрэ.

Икки бырааттарыгар уонна балтыгар сүбэ-ама буолара. Оҕолоругар наһаа бэриниилээх, наар оҕолорун иннигэр түбүгүрээччи.

Ульяна элбэх оҕолоох да буоллар үлэттэн илиитин араарбат этэ. Ол курдук олоҕун бүтэһик күннэригэр дылы оскуолаҕа ѳр сылларга остуорастаабыта. Үлэтигэр кичэллээх, ханнык да сорудаҕы кэмигэр толорон иһэрэ. Бииргэ үлэлиир табаарыстарыныын хаһан да мѳгѳспѳт, куруук үѳрэ-кѳтө, кѳрүдьүѳстэнэ сылдьара.

Ульяна Николаевна олус үчүгэй иистэнньэн, барытын олус кичэйэн, кѳстѳрѳ тупсаҕай буоллун диэн, сиигин барытын кѳнѳ баҕайытык тигэрэ.

Стручков Василий Васильевичтыын эйэ дэмнээхтик 25 сыл олорбуттара 10 оҕону төрөтөн. Ульяна Николаевна нahaa эдэригэр, баара суоҕа 45 эрэ саастааҕар, бу олохтон барбыта. Оҕолору аҕаларын иитиитигэр хаалбыттара.

Бэйэтин үлэтин таһынан улахан дьиэ кэргэн олоҕун тэрийии, дьиэни-уоту кѳрүү, ыалдьыты-хоноһону маанылааһын Ульяна Николаевнаҕа сүктэриллибит эбээһинэс курдук буолара. Кини киэҥ кѳҕустээх, кытаанах санаалаах, тулуурдаах, бэһиэлэй киһи этэ.