Слепцова Елена Егоровна

Слепцова Елена Егоровна өр сылларга доруобуйа харыстабылыгар үлэлээбит үлэ бэтэрээнэ, элбэх оҕо амарах ийэтэ, үгүс сиэн, хос сиэн эбээтэ

Өбүгэ ситимэ диэн хайдах өйдүүгүн?

- Өбүгэ ситимэ диэн мин санаабынан олорон ааспыт өбүгэлэр хайдахтара ол төрөппүт оҕолоругар, сиэннэригэр бэриллэр. Кинилэри ситимниир  саҥалара - иҥэлэрэ, тутталлараа - хапталлара, тугунан дьарыктаналлара, үлэһит удьуордара, талааннара кэнчээри ыччаттарыгар бэриллиитэ. Бу өбүгэлэрин төрүтүн өйдөтөллөр. Саастаах киһи хараҕар анаан - минээн көрдөҕүнэ кинилэри санатар ситим баар буолар.

Сааһырыы, кырдьыы диэн олох биир кэрчигэ... Тугунан кини кэрэний?

- "Кырдьар кырыыс, сорсуйар сор" диэн өс хоһоонугар этиллэринии сааһырбыт киһи кыайбата - хоппото баар суол. Оттон эн кэнчээри ыччаттаах буоллаххына маны билиммэккин. Тугунан кини кэрэний диэтэххэ барытын оҕолоруҥ, сиэннэриҥ эн тускар кыһаналлара, көрөллөрө - истэллэрэ кэрэ.  Кинилэр оонньуулларын, үлэлииллэрин - хамныылларын көрө - истэ олорор бэйэбэр да кэрэ. Бээ, бээ билигин да биир эмэ үчүгэй муускуҕа туран үҥкүлүөхпүн да сөп.

Дьоллоох киһи диэн эн санааҕар кимий?

- "Үөһээ этиллибитин курдук ыччаттаах киһи дьоллоох буолар.

Сөбүлүүр, билэр саха, нуучча суруйааччылардааххын дуо?

- "Нуучча суруйааччыларын бу диэн өйдөөбөппүн. Оттон саха суруйааччыларыттан Күннүк Уурастыырабы, Эллэйи уонна Улуу суруйааччылары билэбин.

Ханнык кинигэлэри ааҕан уйадыйбыккыный?

- Урукку олох ыарын санатар кинигэлэриттэн уйадыйабын, бэйэм оҕо сааһым ааспыт кэмнэрин санатар.

Өйдөөн хаалбыт кинигэҥ геройа?

- Хабырыыс, Хобороос, Чучунаа уонна Сулаанньа.

Хоһоону билэҕин, өйдүүгүн? Өйтөн этэр кыахтааххын?

- Өйдөөбөппүн, ыллыахпын сөп

Сөбүлүүр, олоххо туттар өс хоһоонноруҥ?

- Уостан түһэрбэккэ туттар өс хоһоонум суох. Билэрим, өйдүүрүм диэн "Өрүс долгуннаах, олох очурдаах", "Эйэҕэс киһи үгүс доҕордоһор", "Кырдьаҕаһы хаһаахха укта сылдьан сүбэлэт".

Айылҕаҕа сыһыаныҥ, айылҕа эмтэрин туһаныы?

- Арый эдэр сылдьан айылҕаҕа сылдьарбын олус сөбүлүүрүм. Саамай айылҕа үчүгэй кэмигэр окко сылдьарбын ордорорум, онно хамнанан - имсэнэн наар ырыаннан сылдьар этим.

Олоҕуҥ саамай үөрүүлээх түгэнэ, үөрүү диэн өйдөбүл, туохтан үөрүөҥ этэй?

- Бэйэм наһаа үөрүнньэҥ киһибин, элбэхтэн үөрэбин. Оҕолорум, сиэннэрим бары аттыбар баалларыттан, кинилэри көрөрбүттэн, бары иллээх - эйэлээх олох олороллоруттан үөрэбин. Саамай киһи олоҕор "ЭЙЭ" буоллаа олох тутааччы.

Сүрэххэр, быаргар иҥэрбит дьонуҥ?

- Сүрэхпэр быарбар иҥэрбит дьонум барахсаттар бары бу орто дойдуттан баран тураллар. Доҕотторум элбэхтэр этэ.

Билиҥҥи кэм геройа кимий?

- Мин санаабар олохпутун тута, салайа олорор киһи билиҥҥи үйэҕэ герой.