Слепцова Аксинья Николаевна

Слепцова Аксинья Николаевна – тыыл, үлэ бэтэрээнэ. «1941-1945 сс. Аҕа дойду улуу сэриитин сылларыгар үлэҕэ килбиэнин иһин», «Трудовое отличие», «В.И.Ленин төрөөбүтэ 100 сыллаах үбүлүөйүнэн», үгүс Грамоталарынан, махтах суруктарынан наҕараадаламмыта.

Элгэс улууһугар кыһыл чуумнар, ааҕар балаҕаннар ааспыт үйэ 30-с сылларыгар тэриллибиттэрэ. Ити сылларга кинигэ фондата ббара суоҕа 200-300 экземплярдааҕа. Олохтоохтор көмөлөһөн, кинигэ бэлэхтииллэрэ.

1940-с сылларга Дружинаҕа оройуон толорор кэмитиэтин уурааҕынан бастакы библиотека тэриллибитэ. Маҥнайгы библиотека сэбиэдиссэйинэн Слепцова Аксинья Николаевна ананан үлэлээбитэ. Бэрт сытыы-хотуу, үлэтигэр бэриниилээх, күдэхтээх киһи библиотека сайдарыгар улахан сыратын уурбута. 1945 с. библиотека тимир оһоҕунан оттуллара, 6846 экземпляр кинигэлээх үлэлээбитэ.

Аксинья Николаевна библиотека иһинэн араас өрүттээх үлэни ыытара: элбэх тематическай кинигэ быыстапкалара, кинигэлэри ырытыы, ааҕааччылар конференциялара буолаллара. Нэдиэлэ аайы кулуупка киинэ көстүөн иннинэ хаһыаттары ааҕыы, оройуон, республика араас сонуннарын иһитиннэрии ыытыллара. Хас субуота, бырааһынньык аайы пьесалары толорууга, кэнсиэртэри, араас биэчэрдэри ыытыыга, оройуоҥҥа буолар араас фестивалларга кыттыыга барытыгар Аксинья Николаевна биир сүрүн толорооччуннан буолара. Маны таһынан кини бэрт дьаһаллаах, үлэһит киһи, от-мас үлэтигэр, субуотунньуктарга дьону көҕүлээччинэн, кыайыгас-хотугас үлэһитинэн инники күөҥҥэ сылдьара.

1957-1959 сс. Аксинья Николаевна Уолбут нэһилиэгин библиотекатыгар үлэлээбитэ. Оччолорго нэһилиэккэ бэл орто үөрэхтээх киһи ахсааннаах буолара. Онон Аксинья Николаевна соҕотох идэтийбит үлэһит буолбута. Кини дьон олоҕун тупсараары бастатан туран, уопсай субуотунньук ыыттаран, ыаллар тиэргэннэрин. Уулуссалары ыраастаппыта, бөҕү-сыыһы хомуйтарбыта. Биллэн туран, барытыгар бэйэтинэн кыттыбыта. Нэһилиэккэ кулууп, библиотека иһинэн араас куруһуоктары тэрийэн, таҥаһы-сабы тигэргэ, баайарга, быысапкалыырга, бэл диэтэр бэрэски буһарарга кытта үөрэппитэ. Дьиэ кэргэн, оҕону, ыччаты иитии боппуруостара эмиэ Аксинья николаевна кыттыыта суох быһаарыллыбаттара. Көхтөөх, таһаарыылаах үлэһит 1959 сыллаахха республмка культуратын үлэһиттэрин бастакы съезтэрин делегатынан талыллыбыта. Уолбут нэһилиэгин библиотекатын үлэтэ республика биир саамай чулуу библиотекаларын ахсааннарыгар ааттаммыта уонна культура министиэристибэтин Бочуоттаах Грамотатынан наҕараадаламмыта.