Ефимова Алевтина Васильевна

Ефимова Алевтина Васильевна Саха Республикатын култууратын туйгунун ахтыыта: "Мин 1970 сылаахха Якутскайдааҕы культпроссвет училищетын бутэрэн кэлэн баран, Ураһалаах библиотекатыгар 1981 сылга диэри үлэлээбитим. Библиотека диэтин тимир оһоҕунан ититэллэрэ, ис-тас оноһуута бастакы бириэмэҕэ син сөп түбэһэр курдук этэ. Үлэм бириэмэтэ күнүс 2 чаастан киэһэ 10 чааска диэри этэ. Бу сылларга араас улахан үбүлүөйүнэй даталар сыллара буолан, пропаганда уонна агитационнай-массабай үлэ өрөгөйө этэ уонна чугас саҥа оройуон киинэ тутуллуута, онтон көһөн кэлиитин сыллара буолан, элбэх кэлии-барыы, бары өттүнэн өрө көтөҕүүлээх бириэмэ этэ.

Библиотека - агитационнай-маассабай үлэ киинэ буолара. Манна агитпункт үлэлээн, оччотооҕу агитатордар, пропагандистар мустан мунньахтыыр дьиэлэрэ буолааччы. Кэнники сылларга дьон олорор сирдэринэн агитмаассабай үлэни күүһүрдэргэ агитзоналар диэн тэриллибиттэрэ. Онно дьон бастыҥнара талыллан, агитзона начальниктара диэн баар буолтара. Агитзоналар кииннэрэ уонна кинилэри салайан үлэлэтэргэ библиотека дьиэтэ уонна кини улэһитэ буолааччы. Нэһилиэккэ оччотооҕу дьон, эдэр дьон актыыбынаһа үчүгэй буолан, улэлииргэ чэпчэки буолара. Араас субуотуннуктар, биэчэрдэр, мунньахтар ыытыллаллара. Сотору-сотору оройуонтан, республикаттан, лектордар биирдиилээн да, группанан да кэлэн араас темаларга лекциялары, докладтары ааҕаллара, соҕурууттан-хотуттан кэлэн концерт туруораллара. Итини таһынан республика атын оройуоннарыттан делегациялар кэлэн барааччылар. Тыа сиригэр соччоттон-билиҥҥээҥҥэ диэри культура үлэһиттэрэ бииргэ улэлээн-хамсаан, сылдьааччыбыт.

Мин библиотекам ис-тас көстүүтүн, оформлениятын үчүгэй, тупсаҕай буолаарай диэн оноро сатааччыбын. Ырааһын, итиитин 20-тэн тахса сыл аҥардас манна үлэлээбит Бережнова Федора Николаевна көрөөччү. Библиотека таһыгар күөх маһы олордорбут, ол билигин хойуу тыаҕа кубулуйбут.

Бу үлэлээбит сылларбар Бережнова Евдокия Васильевналын библиотека кинигэтин фондатын барытын саҥаттан инвентаризациялаан онорбуппут, хас биирдии кинигэни библиотека кинигэтин быраабылатынан

суруйбуппут. Фонданы УДК таблицатынан бэйэтигэр сөп гына, толору квалификациялаан туруорбуппут. Кыраайы үөрэтэр литератураны урукку систематыттан уларытан саҥа УДК таблицатынан көһөрбүппүт.Кинигэ фондатын араас сурунаалларга, хаыаттарга суруттаран, онтон-мантан кинигэ сакаастаан, кинигэ маҕаһыыныттан ылан хаҥаттарбыт. Республиканскай бибколлектор быһаччы кинигэ ыытара. Саха, нуучча суруйааччыларын айымньыларыгар аналлаах кинигэ быыстапкаларын оҥорорбут. Оскуола оҕолоругар анаан бэсиэдэлэри ыытарбыт.

Бу кэмнэргэ кинигэ фондата биллэрдик улааппыта, ону тэҥэ ааҕааччы ахсана лаппа үрдээбитэ. Оскуола оҕолоро 100% ааҕааччы буолаллара ирдэнэрэ. Библиотекалар справочно-библиографическай үлэлэрэ: каталогтар, картотекалар, тематическай папкалар уо.д.а. тупсаҕайдык оҥоһуллалара. Нэһилиэнньэ библиотекаҕа сылдьыыта, кинигэни таптаан ааҕара биллибитэ. Киин сиртэн биллиилээх суруйааччылар, артыыстар, общественнай деятеллар кэлиилэрэ-барыылара элбээн араас көрүҥнээх көрсүһүүлэр, литературнай, тематическай биэчэрдэр уонна саҥа кинигэни дьүүллэһиилэр, ырытыылар ыытыллалара. Нэһилиэк общественнай үлэтигэр библиотекардар биллэр-көстөр миэстэни ылаллара, кинилэр үгүстэрэ агитатордар, депутаттар, общественнай тэрилтэ салайааччылара, партийнай уонна комсомольскай үлэлэргэ төһүү күүс үлэһиттэр этилэр.

Үлэлии сылдьан Улан-Үдэ куоракка Илин-Сибиирдээҕи Государственнай култуура институтун «Библиотекарь-библиограф высшей квалификации» идэтигэр ситиһиилээхтик үөрэнэн бүтэрбитим.Үлэбэр ситиһиилэрим иһин култуура Министерствотын, култуура рескомун профсоюһун, бүтүн Россиятааҕы бэтэрээннэр Сэбиэттэрин общественнай холбоһуктарын Бочуотунай Грамотатынан, ветеранскай үлэҕэ актыыбынай кыттыым иһин “Республика Бочуоттаах ветерана” анал Бэлиэ хаһаайына, оройуон, бөһүөлэк дьаһалтатын Бочуотунай Грамоталарынан, наҕараадаламмытым. Кэнники сылларга үлэбэр, тыа сиригэр уонна библиотекаларыгар үлэлээбитим бары өттүнэн үчүгэй сабыдыалы, туһалааҕы биэрбит эбит диэн күндүтүк саныыбын.