Слепцова Светлана Афанасьевна

Культура салаата утумнаахтык сайдарыгар дэгиттэр талааннаах бастыҥ үлэһит, библиотекарь идэтин чахчы баһылаабыт Саха Өрөспүүбүлүкэтин култууратын туйгуна,Үлэ бэтэрээнэ, Абый нэһилиэгин Бочуоттаах олохтооҕо Слепцова Светлана Афанасьевна.

Светлана Афанасьевна 1973 сыллаахха Дьокуускайдааҕы култуурнай – сырдатар училищеҕа кэтэхтэн библиотечнай отделениеҕа үөрэнэ киирбитэ. 1977 сыллаахха үөрэҕин бүтэрэн, Абый нэһилиэгин библиотекатын сэбиэдиссэйинэн анаммыта. Үлэҕэ киирэригэр библиотеканы саҥа тутуллубут кулууп дьиэтигэр биир хоһу көрбүттэрэ. Библиотека фондата оччолорго элбэҕэ суоҕа, (5000) биэс тыһыынча кэриҥэ кинигэлээҕэ. Ааҕааччы ахсаана элбииригэр кыһаллара, күүстээх үлэни ыытара.

Светлана Афанасьевна библиотека фондатын хаҥатыыга, сөптөөх литератураны талыыга үгүс өрүттээх үлэни ыыппыта. Ол курдук Дьокуускайдааҕы бибколлектортан, МБА–тан, «Книга почтой» маҕаһыынтан сакаастаан толорунара. 

1982 сылтан библиотекалар кииннэммит библиотечнай системаҕа кубулуйбуттара. Онтон ыла кинигэ оройуон библиотекатыттан кэлэр буолбутун бэлиэтээн кэпсиир.

1987 сыллаахха библиотека саҥа, туспа ааҕар саалалаах дьиэҕэ көспүтэ. Библиотека дьиэтэ кэҥээн үлэлииргэ чэпчэки буолбута. Кини үлэлиир кэмигэр Абый нэһилиэгин библиотеката улууска, республикаҕа үчүгэй көрдөрүүлээх үлэлээҕинэн биллибитэ. Үлэ үксэ оскуоланы, кулуубу, общественнай тэрилтэлэри кытта ыкса сибээстээҕэ. Олохтоох радионнан биэрии, «Знание» общество иһинэн үлэ, агитзоналар мероприятиелара тэриллэллэрэ. Дорҕоонноох ааҕыы, маассабай үлэлэр нэһилиэнньэҕэ элбэхтэ ыытыллаллара. 

Библиотекарь үлэтэ киэҥ хайысхалаах, ыарахан, ол курдук хас биирдии ааҕааччы интэриэһин, дьоҕурун, билиитин учуоттаан Светлана Афанасьевна сүбэ – ама биэрэрэ, саҥа кэлбит литератураны сырдатан, ааҕааччы киэҥ эйгэтигэр таһаарара. Олох сайдыытыгар сөп түбэһиннэрэн ааҕааччылары тардан араас маассабай дьаһаллары, суруйааччылар айар үлэлэригэр анаммыт биэчэрдэри, конференциялары, кинилэр айымньыларыгар сценкалары, музыкальнай композициялары, литературнай ааҕыылары, ырытыылары, кинигэ быыстапкаларын оҥороро.

Светлана Афанасьевна үлэлээбит кэмиттэн ыла араас өрүттээх сонун үлэни ыытара, ол курдук саҥа телевизионнай оонньуу биэриилэрин көрөн онно олоҕуран сценарий оҥорон, дьону мунньан оонньотон кинигэ интириэһигэр тардара, нэһилиэккэ драмкуруһуогу салайара, оҕолорго хомусчуттар куруһуоктарын тэрийэрэ ону таһынан олохтоох библиотека аатыттан А. Е. Слепцов аатынан Абый орто оскуолатын үɵрэнээччилэригэр 1995 сылтан «Сыл бастыҥ ааҕааччыта» диэн номинацияны спонсордаабыта. Бу номинация үгэс буолан бу күҥҥэ диэри олохтонор. Кини сыралаах үлэтин бэлиэтээннэр үгүс махтал суруктарынан, грамоталарынан наҕараадаламмыта.

Светлана Афанасьевна сахалыы мындыр толкуйа, аныгы үйэ сиэринэн билиитэ – көрүүтэ киэҥ. Үлэлээбит коллективын дьонугар - сэргэтигэр, аймах - уруу дьонугар үтүө сүбэһит буолар.

 Ханнык баҕарар үлэ үчүгэй, интириэһинэй, өскөтүн киһи бэйэтин идэтигэр бэриниилээх буоллаҕына диир Светлана Афанасьевна. Бу ахтыыбар биир да киһини ордук чорботон ааттаан ахтыбатым, өр сыл устата алтыһан бииргэ үлэлээбит дьоммун – сэргэбин барыларын олус күндүтүк саныыбын, 25 сыл дьоллоох күн курдук элэс гынан ааспытыгар кинилэргэ, бииргэ үлэлээбиттэрбэр махтанабын! Барыгытын ааҕар киин 85 сыллаах үбүлүөйүнэн эҕэрдэлиибин!