Слепцова Тамара Константиновна

Слепцова Тамара Константиновна 1945 с. олунньу 5 күнүгэр Уолбут нэһилиэгэр холкуостаах дьиэ кэргэнигэр төрөөбүтэ.

1963 с. Дьокуускайдааҕы култуурнай сырдатар училище, библиотечнай салаатыгар үөрэххэ киирэр. 1966 с. бүтэрэн баран, идэтийбит үлэтигэр үрдүк таһаарыылаахтык 40-тан тахса сыл үлэлээбитэ. 

Тамара Константиновна биир үлэ салаатыгар олоҕун бүүс бүтүннүү биэрэн, үлэҕэ бэриниилээх буолуу холобурунан буолар.

Тамара Константиновна ахтыыта :

"Мин 1966 с. Дьокуускайдааҕы кульпросветучилищаны бүтэрэн баран Абый нэһиэлэгин библиотекарынан ананан барбытым. Кылгас кэмҥэ үлэлии сылдьар Богач Клавдия диэн нуучча дьахтарыттан үлэбин туппутум. Бастаан наар фондабын бэрээдэктээбитим. Библиотека сельсовет хонтуоратын кытта биир хоско баара. Үлэбин чааһын нэһилиэнньэ ааҕарыгар тоҕоостоох гына күнүс 2 чаастан киэһэ 10 чааска диэри быспытым.

Сырдык суох кэмигэр чүмэчи, лаампа сырдыгар үлэлиирим. Сүүстэн тахса ааҕааччылааҕым. Ааҕааччы ахсаана ортотунан 12-13 буолара. Үксүн ыччат, оҕо, интеллегенция сылдьара. Бэчээккэ кэлэр сүрүн хаһыаттарары, сурунааллары суруттарарым. Нэһилиэнньэ ортотугар маассабай мероприялары ыччаты тардан ыытарым. Ол курдук, аан бастаан Эрилик Эристиин "Маарыкчаан ыччаттара" диэн айымньытыгар кулуупка ааҕааччылар конференцияларын ыыппытым. Саха суруйааччыларын айымньыларынан литературнай биэчэри ыытарым. Ааҕааччыларга анааммын араас тематическай папкалары : биллиилээх дьон олохторун, үлэлэрин уонна ахтыыларын, төрөөбүт кыраай историятын туһунан оҥорорум. Суруйааччыларга аналлаах кинигэ быыстапкатын оҥортолуурум. Кинигэни ырытыыны үгүстүк оҥорорум. Ыалларынан сылдьан кырдьаҕастарга дорҕоонноох ааҕыылары, беседалары ыытар этим. Ыччаты кытта ыкса сибээстээх үлэлиирим. "Кругозор" диэн куруһуогу тэрийэн үлэлэппитим. Библиотекаҕа нэдиэлэҕэ биирдэ оҕолор кылааһынан кэлэллэрэ.

1967 с. Уолбут нэһилиэгэр, төрөөбүт сирбэр, ананан барбытым. Слепцова Аксинья Николаевнаттан элбэх сүбэ-ама ылбытым. Онно 20 - ча сыл үлэлээн баран, онтон Уолбут орто оскуолатыгар биюлиотекардаабытым.

В. И. Ленин төрөөбүтэ 100 сылыгар аналлаах "Килбиэннээх үлэтин иһин" диэн мэтээлинэн, комсомол Киин комитетын, РСФСР култууратын профсоюһун, обком, обкомол, райком уо. д. а. граматаларынан наҕараадаламмытым".

"Дьон олорор сиринэн" (архыып матырыйаал, 1981с.) 

Уолбут нэһилиэгэр агитационнай - маассабай үлэни ыытыыга сүрүн оруолу агитпуун ылар. Агитпуун сэбиэдиссэйинэн нэһилиэк Советын депутата Слепцова Тамара Константиновна үлэлээбитэ хаһыс да сыла буолла. Кини туох баар үлэтин былаан быһыытынан ыытар. Агитпуун - үлэтигэр саамай табыгастааҕынан дьон олорор сиринэн үлэни ыытыы буолар. Манна үс зона тэриллибитэ. Зоналарынан үлэ кини штабын эмиэ Тамара Константиновна салайар. 

Быйыл агитзоналар муннуктара көрөргө үчүгэй, тупсаҕай гына оҥоһуллубута. Манна зона бастыҥ үлэлээх рабочайдарын фотолора, үөрэнээччилэр үөрэхтэрин билиитин экрана, о. д. а. элбэх сонуннаах папкалар оҥоһуллан ыйаммыттар.

Агитзоналар элбэх өрүттээх үлэни ыыталлар, араас спортивнай, уус - уран самодеятельность күрэхтэһиилэрэ тэриллэллэр. Ордук үчүгэй 1 - гы номердаах агитзона үлэлиир. Соторутааҕыта агитзоналар остуол оонньуута тенниһигэр, саахымакка, дуобакка күрэхтэһиилэр ыытылыннылар. 

Агитпуун билигин ыытар үлэтин бүтүннүүтүн ССКП XXVI съеһин материалларын үөрэтиигэ түмэр. Ый аайы агитатордарга, политинформатордарга аналлаах семинар ыытыллар. Оройуоннааҕы библиотека филиалыгар "агитаторга көмө" методическай быыстапка тэриллэн турар.