"Сыаҥааннаахтар сэрии ыар сылларыгар" кинигэ сүрэхтэниитэ буолла

Тохсунньу 14 күнүгэр А.А.Дохунаева аатынан култуура киинигэр Анастасия Сорокоумова, Эльдар Садовников хомуйан оҥорбут "Сыаҥааннаахтар сэрии ыар сылларыгар" кинигэ сүрэхтэниитэ буолла. 

Бу тэрээһин нэһилиэк 95 сыллаах үбүлүөйүн, Арассыыйа норуоттарын культурнай нэһилиэстибэлэрин сылын чэрчитинэн ыытылынна. 

Кинигэ 2021 с-ха Кыайыы 76 сылыгар Дьокуускайга "Медиа-Холдинг" хампаанньаҕа 300 экземплярынан бэчээттэнэн тахсыбыта. 

Бу дьоро киэһэҕэ нэһилиэк бэтэрээннэрэ, тэрилтэ салайааччылара, кинигэни сэҥээрээччилэр кыттыыны ыллылар. 

Бастакы чааһыгар Анастасия Гаврильевна кинигэ суруллуутун историятын, кинигэ ис хоһоонунан сэһэргээтэ, биирдиилээн ураты дьылҕалаах дьон туһунан кэпсээтэ. 

Кинигэ 5 түһүмэхтэн турар. Ол курдук, кинигэ сүрүн улахан суолтата, "Кыһалҕалаах кэм хоһуун дьоно" бастакы түһүмэххэ ханна да ахтыллыбатах, наҕараадаҕа тиксибэтэх, тыылга үлэлээбит-хамсаабыт дьон туһунан киирбитэ буолар. 

II-III түһүмэхтэргэ "Аҕа дойдуну көмүскүүр Улуу сэрии 1941-45 сс. килбиэннээх үлэтин иһин" мэтээлинэн, дастабырыанньанан наҕараадаламмыт дьон туһунан ахтыллар. IV

 түһүмэххэ "Сэрии кэмин оҕолоро", V "Сарсыҥҥы сайдыыны салайсан" түһүмэххэ атын сиртэн кэлэн үлэлээбит 9 киһи сырдатыллыбыт. Онон 420 киһи аата ааттаммыт, олоҕо сырдатыллыбыт, 261 оччотооҕу хаартыскалаах сүҥкэн үлэ буолан тахсыбыт.

Эльдар Садовников, Василий Иннокентьевич Сорокоумов видеонан эҕэрдэлээтилэр. СӨ сэрии уонна тыыл бэтэрээннэрин Сэбиэтин бэрэссэдээтэлэ Будимир Дмитриевич Слепцов, Ил Түмэн депутата Евсеев М.Н. суругунан эҕэрдэлэрин ааҕан иһитиннэрдибит.

Иккис чааһыгар нэһилиэк бэтэрээннэрэ Ефимов Николай Петрович, Дохунаева Мария Алексеевна, Дохунаева Екатерина Алексеевна, В.Н.Дохунаев аатынан Муҥурдаах орто оскуолатын дириэктэрэ Мария Михайловна Ефимова, нэһилиэк Баһылыга Олег Петрович Корякин тыл эттилэр. Марианна Данилова, Татьяна Иванова хоһоон ааҕан, эр дьон ансаамбыла "Хайыһар", Иван Сорокоумов "Киһиэхэ - төрөөбүт дойдута", Рада Дохунаева "Туундара" ырыаларынан киэһэни киэргэттилэр. 

Тэрээһин көрөөччүлэрдиин "Сыаҥааннаах" ырыанан түмүктэннэ.

Ыҥырыылаах ыалдьыттарга, бэтэрээннэргэ анаан тэрилтэлэр бэлэмнээбит мааны астаах остуолларын тула олорон, сэһэргэһэ-сэһэргэһэ, сэргээн иһиттилэр-көрдүлэр.

Кинигэ сүрэхтэниитин ыытта библиотекарь Рязанская А.В., музыкальнай нүөмэрдэри бэлэмнээтэ уус-уран салайааччы Гущенко А.И. 

Түмүктээн эттэххэ, А.Сорокоумова Э.Садовниковтыын 5 сылтан ордук элбэх матырыйаалы түмэн, олохтоохторго, кэнчээри ыччакка сүдү бэлэҕи ууннулар. 

Кинигэ атыыга баар.