Квест оонньуу "История кэрчиктэринэн"

Муус устар 26 күнүгэр Муҥурдаах нэһилиэгин модельнай библиотеката 8-11 кылаас үөрэнээччилэригэр "История кэрчиктэринэн" квест-оонньууну тэрийэн ыытта. Тэрээһин Саха АССР 100 сылыгар, Өрөспүүбүлүкэ күнүгэр ананна. Оҕолор таһырдьа биир станцияттан биир станцияҕа сүүрэ сылдьан араас сорудахтары толордулар. Сорудахтар автономия, Саха сирин, нэһилиэк историятын, биллэр дьонун туһунан билиилэрин тургутан көрдүлэр. Оҕолорго чэпчэтии быһыытынан "звонок к другу" көҥүллэммитэ.

Оонньууга 2 хамаанда, барыта 12 оҕо кытынна. Түмүккэ "ЯАССР" хамаанда (хамандыыр - Ефимов Тима, 10 кыл) кыайда. Манна сорудахтары хаачыстыбалаахтык толору быһаарыыны ылла. "Патриоты Якутии" хамаанда биэтэккэ эрдэ кэлбитэ эрээри, сорудахтары көтүмэхтик толорбут буолан, иккис миэстэҕэ тигистэ. 

Оҕолор маннык оонньууга бастакытын кыттыбыттар, наһаа астыннылар. Өссө да оонньуох буоллулар. 

Көхтөөх кыттыы иһин оҕолорго минньигэс ас туттарылынна.