Олоҥхо декадатыгар библиотекаларга тэрээhиннэр

     Сэтинньи 25 күнүттэн ахсынньы 2 күнүгэр диэри Абый улууhугар Олоҥхо декадата буолан ааспыта. Библиотека үлэhиттэрэ нэhилиэнньэ5э араас таhымнаах тэрээhиннэри ыыттылар уонна кытыннылар.

     Муҥурдаах нэһилиэгэр "Уруйдан, Абый олоҥхото!" дьоро киэһэ буолла. Тэрээһиҥҥэ кэлбит ыалдьыттары Култуура киинин үлэһиттэрэ унаар буруо таһааран, арыылаах алаадьынан, кымыһынан маанылаан көрүстүлэр. Олоҥхо киэһэтэ библиотека үлэһитэ Новикова Сахаайа хомуска дьүһүйүүтүнэн саҕаланна. Бастакы чааһыгар Олоҥхо күнүн, айымньы сүрүн уратытын, Абый улууһугар олоҥхону хомуйуу историятын, олоҥхоһуттар ааттарын-суолларын, биллэр-көстөр олоҥхоһуттар тустарынан сырдатылынна. Иккис чааһыгар биир дойдулаахпыт, ытык киһи, Айыы ойууна К.И.Чирков "Туллук тураҕас аттаах Дьураа Бөкө" олоҥхотуттан быһа тардыыны бөлөҕүнэн толорбуттара.

   Уолбут нэhилиэгэр детсаад уһуйааннара библиотекаҕа ыалдьыттаан, Олоҥхо дойдутугар үөрэ-көтө айаннаан С.Васильев "Эрчимэн Бэргэн" олоҥхоттон быһа тардыытын иһиттилэр, төрөппүттэрин кытта олоҥхоҕо олоҕурбут дидактическай оонньуулларын билиһиннэрдилэр, оонньоон көрдөрдүлэр. Эдэр ыччат олоҥхоҕо олоҕурбут геройдарын оҕолоругар уобарастаан, аал луук мас, бухатыыр атынын оҥорон кэлбиттэрэ тэрээһини өссө киэргэттэ. 

    Ураhалаах нэhилиэгин библиотекаря Екатерина Горохова олоҥхо декадатын чэрчитинэн о5о уhуйааныгар "Кыталыкаана Уда5ан кыыс хотун" Новиков П.И. олоҥхотуттан быhа тардан о5олор уруhуйдарын туhанан аа5ан иьитиннэрбитэ. О5олор Пётр Новиков диэн кимин биллилэр, кини айымньыларын кытары билистилэр. Иитээччилэр бу айымньы кыра о5олорго уруhуйа суох кэпсииргэ ыараханын бэлиэтээн көрдулэр. Библиотекарь о5олор уруhуйдарынан бу айымньыга иллюстрация оҥорон туhанан о5о өйүгэр чэпчэкитик киирэр гына оҥорбутун сэргээтилэр.

     Үрүҥ Хайа кииннэммит библиотекарьдара олоҥхо декадатын чэрчитинэн "Кораблик" о5о уhуйааныгар о5олору олоҥхо дьоруойдарын, үс дойду народнай эпос, "Дьулуруйар Ньургун Боотур" олоҥхо туhунан кэпсээтилэр, көрдөрдүлэр. Ону таhынан Үрүҥ Хайа орто оскуолатын 1 кылаас үөрэнээччилэригэр "Олоҥхо - былыргы сахалар эпостара" диэн библиотечнай уруок ыыттылар. Уруокка презентацияннан олоҥхо сюжеттарын, хартыыналарын көрдөрөн сиhилии кэпсээтилэр. Уруок түмүгэр сахалыы остуол оонньуутун оонньотулар уонна олоҥхо хартыыналарын пазл хомууйдулар.