Майыар библиотекатыгар учуутал сылыгар аналлаах тэрээhин

Муус устар 20 күнүгэр Майыардааҕы модельнай библиотекаҕа Учуутал наставник сылыгар аналлаах тэрээһин буолла.

Библиотекарь Надежда Сидорова мустубут учууталлары эҕэрдэлээтэ, кинилэр үүнэр көлүөнэни иитиигэ киллэрбит кылааттарын иһин махтанна. Бэтэрээн учууталлар Лариса Дмитриевна Миронова- Саха Өрөспүүбүлүкэтин үөрэҕириитин туйгуна, учууталлар учууталлара, Владимир Алексеевич Корякин - РФ уопсай үөрэхтээһинин Бочуоттаах үлэһитэ, Саха Өрөспөбүлүүкэтин үөрэҕириитин туйгуна, РФ үлэтин бэтэрээнэ үлэлээбит сылларын истиҥник аҕыннылар. Онтон Акулина Дмитриевна Слепцова - Саха Өрөспүбүлүүкэтин үтүөлээх учуутала, учууталлар учууталлара, үлэ бэтэрээнэ мустубут алын кылаас оҕолоругар саас кэлиитин туһунан аһаҕас уруок ыытта. Манна кини ис иһиттэн сыдьаайан туран оҕолорго эбээннии тылынан "Нөлтэнкэ" диэн ырыаны үөрэттэ. Оҕолор сонно тута ылыммытынан бардылар, учууталлар кытта ылласпыттара кэрэхсэттэ. Киһи сөҕөрө диэн уруок бүтүүтэ оҕолор бары ырыаны ылынан эбээннии хамсана-хамсана ыллаатылар. Бу буолар учуутал үрдүк маастарыстыбата арыллыбыта. Акулина Дмитриевна төһө да сааһырдар "учуутал хаһан баҕарар учуутал" диэн этиини бигэргэттэ.

Тэрээһин бүтэһигэр библиотекарь учууталларга сахалыы саҥа кинигэлэри бэлэхтээтэ.