Муҥурдаах нэһилиэгэр саҥа кинигэ сүрэхтэннэ "Күн сырдыгыныы күндү дьоммут"

Муҥурдаах нэһилиэгэр үтүө үлэһит дьоннордоох, эйэҕэс майгылаах ыала Александра Семеновна, Гаврил Николаевич Ребровтар сырдык ааттарын үйэтитэр "Күн сырдыгыныы күндү дьоммут" диэн саҥа кинигэ сүрэхтэннэ. "Уруккута суох-билиҥҥи суох, билиҥҥитэ суох-сарсыҥҥы суох" диэн мээнэҕэ эппэттэр. Нэһилиэк киэҥ туттар, холобур оҥостор дьоно Муҥурдаах нэһилиэгин Бочуоттаах олохтоохторо Гаврил Николаевич уонна Александра Семеновна Ребровтар олорон ааспыт олохторун, төрдүлэрин  сырдатар саҥа кинигэни хомуйан онордо Саха Өрөспүүбүлүкэ үөрэҕириитин туйгуна, В.Н. Дохунаев аатынан Муҥурдаах орто оскуолаатын социальнай педагога, Михаил Михайлович Слепцов аатынан кыраайы үөрэтэр оскуола түмэлин салайааччыта Анастасия Гаврильевна Сорокоумова.

Кинигэ биһирэмэ олус сэргэхтик ааста. Видеонан эҕэрдэ тыл эттилэр: Дьокуускай куораттан, Хатастан, Абый нэһилиэгиттэн Ребровтар халыҥ аймахтара, оҕолоро, сиэннэрэ, бииргэ үлэлээбит, алтыспыт доҕотторо. Кэрэ күн үтүө түһүлгэтигэр ытыктыыр, убаастыыр ыалларын туһунан элбэх истиҥ ахтыылар, умнуллубат түгэннэр, истиҥ иэйиилээх санаалар этилиннилэр, ылбаҕай ырыалар ылланнылар, кинигэҕэ киирбит хоһооннор ааҕыннылар.

Ону таһынан көрөөччүлэргэ анаан  «Дьоллоох сыыппаралар» оонньоннулар. Александра Семеновна, Гаврил Николаевич кэскиллээх үлэлэрэ, дьоҥҥо-сэргэҕэ оҥорбут үтүөлэрэ биир дойдулаахтарын өйдөрүгэр, сүрэхтэригэр үйэ саас тухары умнуллубат өйдөбүл буолуохтара. Сэттэ оҕону төрөтөн, иитэн-үөрэтэн таһаарбыттара, элбэх сиэн, хос сиэн кинилэр удьуордара быстыбатын туһугар бу кинигэ өлбөөдүйбэт өйдөбүнньүк буолар.