Олоҥхо дэкээдэтигэр аналлаах тэрээһиннэр

Саханы аан дойдуга аар-саарга аатырдыбыт сүдү айымньы Олоҥхо дэкээдэтигэр Абый улууһун библиотекаларыгар араас таһымнаах тэрээһиннэр буолан аастылар.

Үрүҥ Хайа кииннэммит библиотекатыгар бу күҥҥэ анаан олоҥхо биэчэрин музыкальнай оскуола преподавателя Аркадий Алексеевич Егоров иилээн-саҕалаан, алгыс тылынан олус иһирэхтик арыыйда. Ол кэннэ библиотекарьдар Лия Романовна уонна Мария Владимировна олоҥхо суолтатын уонна Абый улууһуттан төрүттээх олоҥхоһуттар туһунан ыалдьыттарга кэпсээтилэр. Тэрээһиҥҥэ Саха Өрөспүүбүлүкэтин Ил Дархан стипендиата 2023 сылга «Эдэр оҕолоргобастыҥ олоҥхону толорооччу» 7 кылаас Үрүҥ Хайа гимназиятын үөрэнээччитэ Слепцова Долгуйаана, Суздалов Иван Андреевич-Сапалаай: “Үчүгэй Үөтэлээн бухатыыр”олонхону этэн, залга мустубут ыалдьыттар биһирэмин ылан ытыс тыаһынан эҕэрдэлээтилэр. Олоҥхо киэһэтэ оһуохайынан түмүктэммитэ.

Майыардааҕы библиотекаҕа оҕолорго анаан «Киэҥ туттар олоҥхобут» диэн интеллектуальнай остуол оонньуута ыытылынна. Бу оонньуну оонньоон оҕолор олоҥхо туһунан билиилэрин хаҥаттылар, олус диэн сэргээтилэр. Саха остуол оонньуутугар хабылыкка, хаамыскаҕа уонна тырыыҥкаҕа холоннулар. Оонньуу кэнниттэн олоҥхо туһунан кинигэлэри кытары билистилэр. Ону тэҥҥэ Надежда Васильевна Майыар орто оскуолатын кытары олоҥхоҕо аналлаах тэрээһини ыытта «Олоҥхо Далбар хотуна». Тэрээһиҥҥэ ийэлэр «Эрчимэн бэргэн» олоҥхоттон быһа тардыыны аахтылар. Үгүс ийэлэр маҥнайгы холонуулара буолла. Ону таһынан оскуола оҕолоругар көстүүм косплея «Мой мир олонхо» буолла.

Уолбут нэһилиэгин библиотекатыгар Вероника Ивановна олоҥхо сүрүн тутулун тула эбээлэри кытары сэһэргэһии киэһэтин ыытта. «Чохоон» ситимигэр кэлиҥҥи кэмҥэ элбэх араас олоҥхону мультфильм оҥорон таһааралларын билистилэр. Төрөөбүт тылы таптыырга, харыстыырга элбэх ньыма баарын туһунан биллилэр уонна олус диэн сэҥээрэн астыннылар.

Уһуйаан оҕолоругар “Олоҥхо дойдута” диэн ааттаах библиотечнай уруок ыытылынна. Оҕолор орто дойду саамай килбийэр киинигэр үүнэр кэрэ мас – Аал луук мас буоларын биллилэр. Библиотека үлэһиттэрэ аал луук мас айыы аймаҕы араҥаччылыырын, Аан алахчын хотун маска олохсуйан олорорун кэпсээтилэр. Олоҥхоттон быһа тардан иһитиннэрдилэр. Остуол оонньуутун олоҥхо сүрүн геройдарын Айыы аймаҕын араҥаччылыырга анаммыт бухатыыры, бухатыыр атын кубиктан таҥан таһааран оонньоотулар.

Муҥурдаах нэһилиэгэр Виктория Викторовна нэһилиэк олохтоохторун иннилэригэр «Дьулуруйар Ньургун боотур» спектакльга оонньоон дьон биһирэмин ылла.

Ураһалаах библиотекаря Екатерина Егоровна “Аптаах алыптаах олоҥхо дойдута” диэн ааттаах алын кылаастарга аналлаах аһаҕас уруок буолан ааста. Бу уруокка оҕолор олоҥхо диэн тугуй, туохтан турарын биллилэр, көрдүлэр. Олоҥхоҕо аналлаах ыйытыыктарга хоруй биэрдилэр. Уруок түмүгэр 3 кылаас үөрэнээччилэрэ Күн Дьирибинэ Бухатыыр туһунан олоҥхоттон быһа тардан ааҕан иһитиннэрдилэр.