Ньукуолун күнүгэр Индигир өрүскэ сиэр-туом ыытылынна

Бүгүн, ыам ыйын 22 күнүгэр, Ньукуолун күн, иитиллэн олорор Индигир эбэбитигэр сүгүрүйүү сиэрэ-туома ыытылынна. Ол курдук, саха сиэринэн, эбэбитин арыылаах алаадьынан, кымыс утаҕынан күндүлээтибит. Хас биирдии киһи бэйэбитигэр кигинэйэн, көмүскэл көрдөһөн, дьаҥы-дьаһаҕы, ыарыыны-туттууну, куһаҕан санааны, хомолтону-курутуйууну киэр кыйдаан, ыраас-сырдык, дьоллоох, эйэлээх олох туһугар баҕа санаабытын эттибит, көрдөстүбүт-ааттастыбыт.

Иитэн-аһатан олорор устар долгун сүүрүктээх Эбэбитин уутун киртитэрбититтэн, киэҥ нэлэмэн ньуурун киэптии кэһэрбититтэн, кыыдааннаах кыһын айан аартыга оҥостон, арҕастыы тоҕо тэпсэрбититтэн, көмүс хатырыктааҕын бултуурбутуттан, көтөрүн-сүүрэрин өлөрөрбүтүттэн алы гыннаран, көрдөстүбүт-ааттастыбыт, махтанныбыт, сүгүрүйдүбүт. 

Бука барыгытыгар сайын кэлбитинэн! Эйгэҕит ыраас, тулаҕыт сылаас буоллун!