Майыарга «Хотугу кэпсээннэр» саҥа тахсыбыт кинигэ сүрэхтэниитэ

Бу күннэргэ Саха Республикатын культуратын үтүөлээх үлэһитэ, Абый улууһун Бочуоттаах олохтооҕо, суруйааччы, поэт, Россия уонна Саха Республикатын журналистарын союһун чилиэнэ Николай Васильевич Слепцов – Абыйчанин төрөөбүт нэһилиэгэр Майыарга «Хотугу кэпсээннэр» саҥа тахсыбыт кинигэтин сүрэхтэниитэ буолан ааста. Сүрэхтэниини улуустааҕы Кииннэммит библиотека үлэһиттэрэ анаан-минээн тиийэн ыыттылар.

«Хотугу кэпсээннэр» кинигэҕэ Абыйчанин араас сылларга суруйбут кэпсээннэрэ киирдилэр. Айымньылар хоту дойду олоҕун-дьаһаҕын, дьонун-сэргэтин, айылҕатын хоһуйаллар. Кинигэҕэ үгүс кэпсээн-үһүйээн  дьиҥнээх олохтон суруллубуттар. Ол курдук, олох иһин охсуһуу, хотугу таптал, эбээн норуотун дьылҕата уустаан-ураннаан, истиҥ иэйиилээхтик суруллубуттар. Итини сэргэ ийэҕэ итии таптал, дьахтарга улуу убаастабыл, уол кыыска истиҥ сыһыанын эдэр ыччаты, үүнэр көлүөнэни иитиигэ сыаллаахтар-соруктаахтар.

Кинигэ тахсыытын, бэлэмнэнии үлэтин, сыалын-соругун туһунан библиограф М.В.Слепцова сырдатта.

Суруйааччы 100 сылыгар анаан «Абыйчанин ыллыгынан» диэн ааттаахоскуола оҕолоругар улуустааҕы күрэх буолбута. Бу күрэххэ кыттыбыт, миэстэлэспит оҕолорго анал бириэмийэлэрин, туоһу суруктарын Кииннэммит библиотека директора В.А.Явловская үөрүүлээх быһыыга-майгыга туттарда.

Кэбэргэнэ олохтоохторо биир дойдулаахтарын аатын үйэтитэр үлэ ыытылларын бэлиэтээн туран, махтал сурук, өйдөбүнньүк бэлэх туттардылар. Н.Абыйчанин хаалларбыт баай нэһилиэстибэтин, архыып докумуоннарын көрөн-истэн, үөрэн, долгуйан тарҕастылар. Тэрээһин уопсай һээдьэнэн түмүктэннэ.