Төрөөбүт тылы харыстаан: "Сахалыы дьыктаан" аахсыйа ситиһиилээхтик ааста

Олунньу 13-14 күннэригэр Абый улууһун бары библиотекаларыгар төрөөбүт тыл уонна сурук-бичик дэкээдэтин чэрчитинэн, саха тылын күүhүрдэр, сайыннарар уонна кини баайын дьоҥҥо тириэрдэр сыаллаах, улахан суолталаах "Сахалыы дьыктаан" аахсыйа ситиһиилээхтик буолан ааста. Бу тэрээhин сүрүн сыала - олохтоохтор болҕомтолорун төрөөбүт тылбыт сайдыытыгар, ыраас буолуутугар тардыы, саха тылын ытыктабылын, тапталын уонна төрөөбүт тылга сөпкө суруйууну чиҥэтиигэ туһуланна, олохтоох нэһилиэнньэ тыл кэскилигэр кыттыытын үрдэттэ.

Дьыктаан кыттааччылара Саха норуодунай суруйааччыта, Саха литературатын классига Д.К.Сивцев - Суорун Омоллоон айымньытыттан, ол эбэтэр "Чүөчээски" кэпсээниттэн интэриэһинэй быһа тардыытыттан сурууйдулар. Бу айымньы нөҥүө дьон саха тылын баайын, тылбыт уус-уран күүһүн, кэрэтин өссө төгүл билэн-көрөн аастылар.

Тэрээhиҥҥэ оскуола үөрэнээччилэриттэн саҕалаан, улахан дьоҥҥо тиийэ уопсайа 107 киһи көхтөөхтүк кыттыыны ылла, ол иһигэр 58 улахан киһи уонна 49 оҕо баар. Кыттааччылар төрөөбүт тылга интэриэс улаханын, кинини үөрэтиигэ уонна чөлүнэн тутууга баҕа баарын ырылыччы көрдөрөр. 

Кыттааччылар билиилэрин бэрэбиэркэлээһин түмүгүнэн, үрдүк көрдөрүүнү "5" сыанаҕа суруйбут 9 киhи ситистэ. Бу көрдөрүү дьон саха тылын грамматикатын, орфографиятын дириҥник билэллэрин туоһулуур. Тыл баайыгар, суругу-бичиги сөпкө тутарга дьулуhан, сахалыы кэрэ тылга бэриниилэрин көрдөрдүлэр.

Маннык аахсыйалар төрөөбүт тылбыт чөлүнэн хаалыытыгар, кэлэр көлүөнэҕэ бэриллэригэр улахан кылааты киллэрэллэр. Абый улууһун библиотекалара тыл сайдыытыгар, норуот культуратын тарҕатыыга сүҥкэн оруолу ылаллар, дьону кэпсэтиигэ, үөрэххэ уонна билиигэ ыҥыраллар. Инникитин даҕаны маннык аахсыйалар элбэхтик ыытыллан, саха тылын кэскилэ өссө кэҥииригэр, чөлүнэн сайдарыгар эрэлбит улахан.