Аҕа дойдуну көмүскээчилэр күннэригэр анаммыт эр дьон күрэҕэ

Олунньу 26 күнүгэр Ураhалаах нэһилиэгэр Аҕа дойдуну көмүскээчилэр күннэригэр анаан, дьиэ кэргэн тирэхтэрин, эркин курдук эрэллээх, эр дьону эт-хаан өттүнэн хамсата, өйүн-санаатын тургутар күүстээх-уохтаах сэргэх тэрээһин буолан ааста. Бу күрэх библиотека уонна Култуура дьиэтин тэрийиитинэн, нэһилиэккэ чөл олоҕу көҕүлүүр, эр дьону күүстээх, кыайыылаах буолалларын өрө тутар сыаллаах ыытылынна.

Күрэх саҕаланыыта библиотекарь Екатерина Егоровна эр бэрдэргэ "Каждый парень - бравый воин!" диэн ааттаах викторина ыытта. Кыттааччылар Аҕа дойду историятыгар, сэрии сылларыгар, байыаннай үөрэххэ сыһыаннаах ыйытыыларга бэйэлэрин билиилэрин көрдөрдүлэр. Маныаха эр дьон бэлэмнээхтэрин, хорсун санааларын биллэрдилэр.

Интеллектуальнай күрэх кэнниттэн уолаттар уонна эр дьон эт-хаан өттүнэн күүстэрин тургуттулар. Көрөөччүлэр, ол иһигэр дьиэ кэргэннэрэ, оҕолоро, аймахтара, доҕотторо, ытыс таһыннаран, хаһыытаан-ыһыытаан, кыайыыга дьулуһалларын өйөөтүлэр. Залга үөрүү-көтүү, долгуйуу баһыйара. Хас биирдии күрэх олус кэрэхсэбиллээхтик, тыҥааһыннаахтык ааста.

Күрэх түмүгүнэн, хас да көрүҥҥэ барыларыгар чулуу буолан, бастакы миэстэни Стручков Александр ылла. Кини эр бэрдэрин үрдүк бэлэмин, күүһүн-уоҕун, дьулуурун көрдөрдө. Иккис миэстэҕэ сөбүгэр бэлэмнээх, модун санаалаах Сахамин Николаев таҕыста. Үһүс миэстэни тилэх баттаһан, үчүгэй көрдөрүүлэри ситиһэн, Григорий Борзов ылла.

Кыайыылаахтары уонна призердары тэрээһин тэрийээччилэрэ истиҥник эҕэрдэлээтилэр, грамоталарынан уонна бэлэхтэринэн наҕараадалаатылар. Бу тэрээһин эр дьон бырааһынньыгын өссө кэрэхсэбиллээх оҥордо, кинилэр биир ньыгыл буолалларын, биир сиргэ түмсэн сынньаналларын, күүстэрин тургуталларын көрдөрдө. Маны таһынан, чөл олоххо ыҥырар, доруобуйаны бөҕөргөтөр суолталаах диэн бэлиэтээтилэр.