"Аймахтыылар ааҕыылара": дьиэ кэргэн уонна төрөөбүт дойду ситимэ

Ыам ыйын 15 күнүгэр, Дьиэ кэргэн аан дойдутааҕы күнүгэр, Майыар нэһилиэгэр сэргэх тэрээһин буолан ааста. Майыар библиотеката уонна Майыар орто оскуолатын библиотекатын көҕүлээһиннэринэн, "Аймахтыылар ааҕыылара" Арчы дьиэтигэр ыытылынна.

Бу тэрээһин сүрүн сыала — көлүөнэлэр ситимнэрин бөҕөргөтүү уонна эдэр ыччакка төрөөбүт дойдуларын, аймах-билэ дьоннорун остуоруйатыгар тапталы иҥэрии. Оскуола үөрэнээччилэрэ бэлэмнэнэн, Майыар нэhилиэгин биллэр-көстөр, ааттаах-суоллаах дьоннорун олохторун уонна айар үлэлэрин туһунан иһирэхтик кэпсээтилэр.

Оҕолор бэйэлэрин аймахтарын, нэһилиэк киэн туттар дьонун — Слепцов П.Е. - Ойуун Борокуоппай, Хабарова Х.Н., Бабиченко М.Н. - Майыар Маарыйата, Слепцов Н.С. - Радист, Корякина М.Н., Садовников С.С., Хабаров Г.Г., Соломов Е.П. тустарынан кэпсээтилэр. Хас биирдии нүөмэр истиҥ-иһирэх тыыннаах буолан, көрөөччүлэр биһирэбиллэрин ылла.

Тэрээһин биир умнуллубат түгэнинэн библиотекарьбыт бэйэтин этиитэ буолла. Кини суруйааччыбыт, суруналыыс Николай Васильевич Слепцов - Абыйчанин айар үлэтин сырдатта, кини айымньыларыгар төрөөбүт дойдуга таптал, дьоҥҥо-сэргэҕэ ытыктабыл тиэмэтэ күүскэ арылларын бэлиэтээтэ.

Библиотека үлэһиттэрэ бу күн мустубут дьоҥҥо анаан, архыыптан хостоон таһааран, олус сэдэх хаартыскалары уонна олохтоох суруйааччылар тустарынан матырыйааллары көрдөрдүлэр. Ону таһынан, оҕолор бэйэлэрин чинчийиилэригэр "Майыар айар куттаахтара" диэн кинигэттэн туһалаах информацияны туһаммыттарын кэпсээтилэр.

"Аймахтыылар ааҕыылара" тэрээһин дьиҥнээх история уруога, көлүөнэлэр көрсүһүүлэрэ буолла. Маннык тэриллиилэр оҕолорго төрөөбүт түөлбэлэригэр тапталларын күүһүрдэн, инникитин да үтүө дьыаланы оҥорор, дойдуларын ааттатар дьон буола улааталларыгар тирэх буолаллара саарбаҕа суох.