Ньургуһун күнэ

Сыллата ыам ыйын 18 күнүгэр республикабытыгар НЬУРГУҺУН күнэ бэлиэтэнэр. Бу күҥҥэ аналлаах биэчэр улуустааҕы Киин библиотекаҕа үтүөнү-кэрэни таптааччылары түмтэ. Тэрээһиҥҥэ ньургуһун туһунан элбэх иһитиннэрии оҥоһулунна, чахчылар, бит-билгэ сырдатылынна.

Бу – кэрэ, олус нарын эрээри, тоҥ буору тобулан, хаар ууллуутун кытта тэҥҥэ тыллар, күүстээх санааны бэлиэтиир көрүөхтэн кэрэ сибэккигэ элбэх хоһоон суруллар, үгүс ырыаайыллар. Биэчэри «Кыраһа» народнай ансаамбыл, Аграфена Глушак, Изольда Атласова ньургуһун туһунан кэрэ-нарын ырыаларынан киэргэттилэр. Итини сэргэ, биир дойдулаахпыт, элбэх истиҥ ырыалар автордара Мария Стручкова «Ньургуһуннар» ырыатын толорбутун архыып видеоттан долгуйа көрдүлэр.

Тэрээһиҥҥэ ньургуһун туһунан видеоклиптар көрдөрүлүннүлэр, элбэх ырыа ылланна. Маны сэргэ, эмтээх оттор тустарынан викторина, остуол оонньуута, ньургуһун сибэккини оҥорууга маастар-кылаас кэлбит дьон болҕомтотун тартылар.